MANILA, Philippines – Game-time decision pa rin ang status ni Jasyon Castro kung isasalang ng TNT Katropa kontra sa San Miguel sa 2018 PBA Governor’s Cup sa Calasiao Sports Complex sa Calasiao, Pangasinan.
“Not sure pa (kung lalaro na) si Jayson,” wika ni coach Bong Ravena kay Castro.
Ayon kay Ravena, ito ay sa kabila ng pagsasanay na ni Castro simula noong nakaraang Linggo matapos makarekober sa kanyang bone spur removal surgery.
“Sumasama na siya sa practice. He’s with us here in Calasiao,” dagdag pa ni Ravena.
Noong nakaraang buwan ay sumailalim si Castro sa operasyon para tanggalin ang bone spur sa kanyang kanang paa.
Nagrehistro ng 15.7 points, 4.0 rebounds at 4.33 assists, hindi nakita si Castro sa dalawang laro ng Tropang Texters.
Sa kabila ng kanyang pagkawala ay nakagawa ng paraan ang TNT Katropa na manaig pa rin bunsod ng three-game winning streak para umangat sa 4-4 baraha mula sa 1-4 simula.
At bagama’t wala pang kasiguraduhan kung makakalaro na siya ay solido pa rin naman ang masasandalang line-up ng Tropang Texters sa pangunguna ng dating Best Import na si Marque Blakely, Terrence Romeo, Troy Rosario at Roger Pogoy.