Malinis na rekord itataya ng BanKo

MANILA, Philippines — Itataya ng BanKo Perlas ang malinis na rekord nito laban sa paboritong Creamline sa pagpapatuloy ng Premier Volleyball League Season 2 Open Conference ngayong araw sa The Arena sa San Juan City.

Nakatakda ang ina-abangang salpukan ng Perlas Spikers at Cool Smashers sa alas-6 ng gabi matapos ang bakbakan ng Ateneo de Manila University at Tacloban sa alas-2.

Namamayagpag ang BanKo Perlas tangan ang imakuladang 5-0 kung saan nagtala ito ng sweep kontra sa Lady Eagles at pare-parehong 3-1 panalo laban sa Iriga-Navy Lady Oragons, PetroGazz Angels, Adamson-Akari Lady Falcons at Tacloban Fighting Warays.

Partikular na aasahan ng Perlas Spikers si Dzi Gervacio na may average na 18.5 points sa kabilang dalawang huling laro.

Malalim ang bench ng BanKo Perlas dahil nariyan sina UP stalwarts Nicole Tiamzon at Kathy Bersola, Adamson standouts Amanda Villanueva at Joy Dacoron at setters Jem Ferrer at Fenela Emnas na nagsasalitan ng playmaking duties.

Ngunit haharap ang Perlas Spikers sa Cool Smashers na nakasakay din sa four-game winning streak kabilang ang five-set win sa three-time PVL champion Pocari-Air Force.

Kasalukuyang nasa No. 2 ang Cool Smashers kasalo ang Lady Eagles hawak ang magkatulad na 4-1 marka.

Numero uno ang Creamline sa spiking hawak ang 35.09 percent success.

Nangunguna sa attack line si Alyssa Valdez na siyang pangunahing pinagkukunan ng puntos ng Cool Smashers.