MANILA, Philippines — Sasarguhin ng BanKo Perlas ang kanilang ika-limang sunod na panalo sa pakikipagtipan sa Tacloban sa pagpapatuloy ng Premier Volleyball League Season 2 Open Conference sa The Arena sa San Juan City.
Magtutuos ang Perlas Spikers at Fighting Warays ngayong alas-4 ng hapon na susundan ng laban ng nagdedepensang Reinforced Conference champion na Creamline at Adamson University sa alas-6 ng gabi.
Namamayagpag ang BanKo Perlas hawak ang imakuladang 4-0 baraha para okupahan ang solong pamumuno sa torneo.
Nanggaling ang Perlas Spikers sa 27-25, 25-19, 25-11 panalo kontra sa Ateneo de Manila University kung saan bumida sina dating University of the Philippines ace Nicole Tiamzon at Ateneo de Manila University star Dzi Gervacio.
Matapos malimitahan sa anim na puntos sa 25-20, 19-25, 25-22, 25-16 panalo ng Perlas Spikers sa Lady Falcons ay bumawi si Tiamzon kontra sa Lady Eagles nang magtarak siya ng 17 puntos kabilang ang 12 attacks.
Nagsumite naman si Gervacio ng 14 hits, habang may 11 markers si Kat Bersola para sa solidong ratsada ng Perlas Spikers.
Kaya naman mataas ang moral ng BanKo Perlas na galing din sa third-place finish sa nakaraang Vinh Long Cup sa Vietnam.
Sa kabilang banda, umaasa ang Fighting Warays na makakabalik agad sila sa porma matapos lumasap ng 15-25, 21-25, 15-25 kabiguan sa Cool Smashers noong nakaraang linggo.
Nakahimpil ang Tacloban sa ikalimang puwesto hawak ang 2-2 marka.
Magtutulung-tulong sina Jovielyn Prado, Heather Guino-o, Andrea Marzan at Mary Anne Esguerra para makabawi ang kanilang tropa.
Walang nakakuha ng double digits sa kanilang huling laro matapos malimitahan sa pito sina Prado at Guino-o at tig-tatlo naman sina Marzan at Esguerra.