LSGH Team A, NSNU kampeon sa SBP-Passerelle Twin tournament

MANILA, Philippines — Pinabagsak ng La Salle Green Hills-Team A ang Ateneo De Manila University, 64-44 noong Linggo tungo sa kanilang ikaapat na sunod na titulo sa 33rd Season ng Small Basketeers Philippines-Passerelle Twin Tournament na ginanap sa Colegio San Agustin Gymnasium sa Makati.

Nagtala si Andre Mikael Minas ng game-high na 13 points katulong si Joaquin Alessandro Torres na may 9-points para sa Greenies na naka-sweep ng eliminations, 4-0 bago talunin ang De La Salle Santiago Zobel-Team A, 49-33 sa semifinals noong Sept. 9 din para sa title match kontra sa Blue Eaglets sa torneong sponsored ng Milo at suportado ng Rain or Shine at Chris Sports.

Dahil dito, lalaban ang Greenies sa SBP-Passe-relle Twin Tournament National Finals sa December sa Pampanga.

Sa Passerelle division finals, ‘di na nagpapigil ang Nazareth School of National University para maghari sa torneo matapos ang 74-57 panalo sa La Salle Green Hills-Team A para sa kanilang unang titulo.

Umiskor ng tig-12 puntos sina Kenji Duremdes na anak ng PBA Legend na si Kenneth, Reinhard Jumanoy at Poul Justin Palacielo para sa Bullpups na nagtala ng malinis na 5-0 record sa eliminations bago dinispatsa ang Ateneo De Manila University, 68-51 sa semifinals noong Sept. 9 din para itakda ang championship game kontra sa Greenies.

Si Minas ang tinanghal na MVP sa SBP division. Ang DLSZ-Team A at Claret School of Quezon City ang third at fourth placers, ayon sa pagkakasunod. Ang MARIST School ang tumanggap ng Sportsmanship award.

Si Reinhard Jumanoy ang MVP sa Passerelle division habang ang San Beda University at Ateneo De Manila University ang third at fourth placers. Sa Bullpups din ang Sportsmanship award.