MANILA, Philippines — Winalis ng College of St. Benilde ang University of Perpetual Help System Dalta , 25-11, 25-22, 25-18, para manatiling buhay ang pag-asa sa Premier Volleyball League Season 2 Collegiate Conference kahapon sa The Arena sa San Juan City.
Minanduhan ni Marites Pablo ang atake ng Lady Blazers nang umani ng 13 puntos mula sa siyam na attacks, tatlong aces at isang block kasama pa ang siyam na digs, habang nagdagdag sina Arianne Daguil at Klarisa Abriam ng tig-siyam na puntos.
Umangat ang Lady Blazers sa 3-4 baraha, habang tinapos ng Lady Altas ang kampanya hawak ang 1-6 marka.
Mawawalan ng saysay ang paghihirap ng St. Benilde kung tatalunin ng University of the Philippines ang San Beda sa kanilang duwelo ngayong hapon.
Hawak ng Lady Maroons ang 3-3 baraha kung saan isang panalo na lamang ang kailangan para samahan sa semis ang Adamson, UST at Far Eastern University.
Sa men’s division, tinalo ng Adamson ang St. Benilde, 25-16, 18-25, 25-20, 31-29, para sa tiket sa Final Four.