MANILA, Philippines — Ligtas na nakarating ang Batang Gilas sa Argentina kahapon para sa 2018 FIBA Under-17 World Cup na nakatakda sa Hunyo 30 hanggang Hulyo 8 sa Sta. Fe at Rosario, Argentina.
Ika-34 sa buong mundo, kagrupo ng Pilipinas sa Group D ang European champion at World No. 7 France, ang host Argentina (8th) at Croatia (10th) kung saan ang top two teams sa bawat grupo ang papasok sa knockout quarterfinals.
Sina 7-foot-1 Kai Sotto at 6’7 Carl Tamayo ay sasamahan nina 6’8 Geo Chiu, 6’7 Raven Cortez, RC Calimag, Forthsky Padrigao, Terrence Fortea, Gerry Abadiano, Bismarck Lina, Migs Pascual, Rafael Go, Joshua Lazaro and McLaude Guadana.
Maagang dumating sa Argentina ang Batang Gilas upang paigtingin ang kanilang paghahanda sa pamamagitan ng tune-up games kontra sa Canada, New Zealand at Egypt.
Bubuksan ng Batang Gilas ang kanilang kampanya kontra sa Croatia sa Hunyo 30 at sa Hulyo 1 laban naman sa France.
Magpapahinga ang Batang Gilas sa Hulyo 2 bago labanan ang Argentina sa Hulyo 3.
Sa pangunguna ni Sotto na tinanghal na pinakamagaling na sentro ng Asya, nakapasok ang Batang Gilas sa FIBA Under-17 World Cup sa ikalawang pagkakataon simula noong 2014 nang pumang-apat sa likod ng kampeon na Australia, China at New Zealand sa 2017 FIBA Under-16 Asia Championship sa Foshan, China.