Ayan na si Curry

OAKLAND, California - Marami ang nagta-tanong tungkol sa shooting touch ni Stephen Curry dahil sa Games One at Two ng Western Conference Finals ay tumipa lamang ang two-time NBA MVP ng isang three-point shot.

Ngunit sa Game Three ay kumamada si Curry ng 5-for-12 shooting sa 3-point line para tumapos na may 35 points at banderahan ang Golden State Warriors sa 126-85 pagdurog sa Houston Rockets.

“I never lose confidence, and I knew to just keep searching in the right ways to find some openings, and things would work out. I got to the free throw line for an and-one and saw the ball go in. It was the right place at the right time,” sabi ni Curry.

Nakabawi ang Golden State mula sa naunang pagkatalo sa Game Two sa Houston para ilista ang 2-1 abante sa serye.

“Everybody’s been talking about him, and what he did tonight didn’t surprise any of us because that’s just who he is. He’s got unbelievable character, great talent, and it always rises when it needs to,” wika ni coach Steve Kerr kay Curry.

Ito ang ika-16 sunod na home playoff win ng Warriors, nakahugot ng double digits sa kanilang mga starters kasama ang 25 points ni Kevin Durant.

Nagdagdag naman si Klay Thompson ng 13 markers kasunod ang 11 points ni Quinn Cook.

Ipinoste ng Golden State ang 21-point lead, 64-43 hanggang maibaba ito ng Houston sa 13-point deficit sa pamamagitan ng 10-2 atake nina James Harden at Chris Paul.

Naghulog naman ang Warriors ng 13-0 bomba para itayo ang 27-point advantage na hindi na nagawang putulin ng Rockets.