SHANGHAI, China - Nakalikom si Palarong Pambansa Most Bemedalled Athlete Micaela Jasmine Mojdeh ng pinakamataas na FINA points upang angkinin ang Most Outstanding Swimmer award sa 2018 Shanghai Invitational Swimming Championships na ginanap sa Oriental Sports Center dito.
Nagrehistro ang Immaculate Heart of Mary College-Parañaque at reigning Philippine Swimming League (PSL) Swimmer of the Year ng 557 puntos nang mapanalunan nito ang gintong medalya sa 200m butterfly sa bilis na dalawang minuto at 27.97 segundo sa girls’ 11-12 division.
“It’s her first time to win a Most Outstanding Swimmer award through FINA points and she got it by beating tall and older opponents from different countries. We’re so proud of her,” pahayag ni PSL president Susan Papa.
Sa kabuuan, may tatlong gintong medalya ang nakamit ni Mojdeh sa torneong nilahukan ng mahigit 1,200 tankers mula sa 30 bansa.
Maliban sa kanyang ginto sa 200m butterfly, na-ngibabaw din si Mojdeh sa 100m butterfly (1:07.25) at 50m butterfly (30.62) upang lubos na paningningin ang kanyang kampanya sa torneo.
Kasama rin sa delegasyon sina Aklan Swimming Team standouts Lucio Cuyong II (boys’ 14-year) at Joana Amor Cervas (girls’ 11-12) na humirit ng medalya sa kani-kaniyang kategorya.
Nakasungkit ang Indian Ocean All-Star Challenge medalist na si Cuyong ng dalawang pilak sa 200m breaststroke (2:43.00) at 50m breaststroke (32.85) at tanso naman sa 100m breaststroke (1:16.00).
Nagdagdag ng isang tanso si Cervas, beterano ng Japan Age-Group Swimming Championship sa 100m butterfly (1:25.74).
“Hopefully next time we’ll be able to send more swimmers to compete here. It’s a good exposure for our swimmers beacuse they’ll be competing against Chinese, Singaporeans, Europeans and some Americans,” dagdag ni Papa.