Petron iginupo ang Smart

MANILA, Philippines — Nagulat man ang top seed Petron Blaze sa ipinakitang laro ng No. 8 seed Smart Prepaid, nagawa pa rin nilang lampasan ang hamon sa pamamagitan ng 25-22, 22-25, 25-18, 26-24 panalo kahapon sa simula ng second round elimination ng 2018 Chooks to Go-Philippine Superliga Grand Prix sa Baliwag Sports Center, Baliwag, Bulacan.

Akala ng marami ay tapos na ang laban pagkaraang makuha ng Petron Blaze Spikers ang unang set, 25-22, sa loob ng 26 minutos pero nabig-la ang tropa ni coach Shaq De Los Santos matapos magpamalas ang Cuban import ng walong atake at dalawang aces para angkinin ang ikalawang set, 22-25.

“Nagulat talaga kami sa nilalaro ni Gyselle (Silva) kaya naging hamon na rin namin na pigilin namin siya. It’s a good work for the team dahil nanalo pa rin kami,” sabi ni Mika Reyes.

Dahil wala pa rin ang ikalawang import na si Hillary Hurley dahil sa injury, nag tulung-tulong na ang buong tropa ni De Los Santos para pigilin ang paghataw ni Silva.

Sa kanilang ika-walong sunod na talo, nasayang ang kabuuang 38 puntos ni Silva kabilang na ang 31 atake, limang aces at dalawang blocks.(FCagape)