MANILA, Philippines — Ito na ang inaasahang magiging pinakamabigat na laban ni Filipino world super flyweight champion Jerwin Ancajas.
Nakatakdang ipagtanggol ng 25-anyos na si Ancajas ang kanyang suot na International Boxing Federation super flyweight title laban kay Irish challenger Jamie Conlan ngayon sa SSE Arena sa Belfast, Ireland.
Nangako ang tubong Panabo, Davao del Norte na muli niyang isusuot ang kanyang korona pabalik ng Pilipinas matapos talunin si Conlan.
Ito ang ikatlong sunod na pagkakataon na idedepensa ni Ancajas ang kanyang bitbit na IBF super flyweight crown.
Noong Enero ng 2016 ay dumayo si Ancajas sa Macau, China para talunin si Jose Alfredo Rodriguez via seventh-round technical decision sa Cotai Arena kasunod ang kanyang seventh-round TKO win laban kay Teiru Kinoshita ng Japan noong Hulyo 2 sa Suncorp Stadium sa Brisbane, Australia.
Ang nasabing laban sa Australia ang nagsilbing main undercard ng suntukan nina Manny Pacquiao at Jeff Horn para sa World Boxing Organization welterweight title.
Ang Ancajas-Conlan title match ay main undercard ng laban nina Carl Frampton at Mexican Horacio Garcia.
Kasalukuyang hawak ni Ancajas ang 27-1-1 win-loss-draw ring record tampok ang 18 knockouts sa pagsagupa kay Conlan (19-0-0, 11 KOs).
Si Ancajas ang ikatlong Filipino world champion sa kasalukuyan maliban kina IBF light flyweight ruler Milan Melindo at IBF flyweight titlist Donnie ‘Ahas’ Nietes.
“He’s world champion for a reason and in a division that’s pretty hot and heavy, he’s up there with the best of them, so it will take the very best of me to beat him,” sabi ni Conlan.