MANILA, Philippines -Muling nakatikim ng panalo ang kabayong Yes Yes Yes matapos domimahin ang race one na pinaglabanan kagabi sa Santa Ana Park sa Naic, Cavite.
Outstanding favorite ang kabayong dala ni Pat Dilema at pinangatawanan ng tambalan ang mataas na ekspektasyon sa kabayo nang magbanderang-tapos ito sa 1,300-metro distansya.
Anim ang naglaban sa unang karera at unang humamon ang Purple Ribbon na sakay ni RR Camanero.
Ngunit bumigay agad ang kabayo matapos lamang ang unang kurbada bago pumalit ang pinaboran ding Headline Chaser na dala ni Roderick Hipolito.
Galing sa segundo puwesto ang Headline Chaser noong Abril 10 at nakapanakot ang tambalan nang dumikit sa Yes Yes Yes sa huling liko.
Ngunit hindi pa ubos ang kabayong may lahing Accout Of Grace at Belle Epoque para muling kumaripas ng takbo tungo sa tatlong dipang panalo sa meta.
Ang winning time ay 1:20.8 sa kuwartos na 7, 23, 24, 26 para mahigitan ang pang-apat na puwestong tinapos noong Abril 4.
Ito rin ang unang panalo sa buwan ng Abril ng kabayo na huling kuminang ang takbo noon pang Marso 17.
Ang win ay nagpasok ng P8.50 habang ang 6-3 forecast ay mayroong P12.00 dibidendo.