Dear Vanezza,
Isa po akong kasambahay, 25 years old at dalaga pa. May naging ka-textmate ako. Isang linggo kaming nag-text bago kami nag-eyeball. Nagkita kami ng personal sa isang mall at kumain sa fastfood. Pagkatapos ay namasyal kami sa Luneta. Dito siya nagtapat sa akin ng pag-ibig. Nag-meet kami uli at sinagot ko na siya. Tuwing day off ko kapag Sabado ay nagkikita kami. Hanggang sa dinala niya ako sa motel. Hindi na ako nakatanggi sa kanya. Ibinigay ko ang aking sarili. Mga tatlong beses nangyari ito hanggang sa mabuntis ako. Iyan po ang problema ko ngayon. Nang malaman ito ng bf ko, hindi na siya nagpakita at ayaw nang sumagot sa text ko. Malapit nang isang buwan ang tiyan ko. Natatakot ako at baka palayasin ako ng amo ko kapag nalaman ang kalagayan ko. Ano ang gagawin ko? - Jeni
Dear Jeni,
Magtapat ka sa iyong amo. Tao ka lang naman na nagkasala at marahil ay mauunawaan ka niya. Wala kang ibang magagawa dahil nagkasala ka at aanihin mo ngayon ang bunga ng iyong pagkakamali. Huwag mo na ring asahan na magpapakita pa sa’yo ang ka-text mo dahil halatang tinatakbuhan niya ang pananagutan niya sa’yo. Sana’y nagsilbing aral sa iyo ang karanasan mo. Huwag basta-basta ipagkakatiwala ang sarili kung kani-kanino.
Sumasaiyo,
Vanezza