MANILA, Philippines — Malapit nang matapos ang Los Bastardos na tumagal din ng halos isang taon.
Haharapin na ng magkakapatid na Cardinal ang pinakamalaking laban ng kanilang buhay—ang puksain ang kasamaan ni Catalina (Jean Saburit) gamit ang pagmamahal sa pamilya, pag-ibig, at katapangan.
Mananatili pa rin ang pag-asa sa puso nina Isagani (Jake Cuenca), Lorenzo (Joseph Marco) at Lucas (Albie Casiño) na mahahanap nila si Connor (Joshua Colet) at muling mababawi si Matteo (Marco Gumabao) mula sa kamay ng mga kalaban ngayong isa-isa nang napapabagsak ang mga tauhan ni Catalina, dahilan para humina ang kanyang masasamang balak.
Kinapulutan ng aral ang pagmamahalan nina Don Roman (Ronaldo Valdez) at Soledad (Gloria Diaz) na parehong hindi sumuko sa kanilang walang kapantay na pagmamahalan kahit paulit-ulit silang sinubok ng tadhana.
Pero lately ay mas naging kontroberyal ang nasabing serye dahil sa duraan nina Maxine Medina at Kylie Versoza.
Ayon mismo kay Kylie, bilang isang kontrabida ay hindi siya agad nakawala sa kanyang karakter.
“Nagkaroon kami ng eksena ni Maxine. Napalakas po ang eksena ko, super heightened ang emotions so napalakas.
“Nakaposas po ako, dalawang pulis ang nakahawak sa akin.
“So napalakas talaga, nadala talaga sa eksena. Nag-sorry naman ako right after. Kasi hindi na talaga ako ‘yun,” kwento ni Kylie kahapon sa finale presscon ng Los Bastardos.
“Nag-switch kasi from bida to kontrabida, first time actor po ako, so talagang grabe po ang naging emotion, nakaka-challenge. Hindi mo naman maiiwasan na may nasasaktan. Ako nga po ang dami kong pasa-pasa.”
Idinenay nito na nagselos siya kay Maxine at sa madalas nitong kaeksena na si Jake Cuenca kaya niya ito dinuraan.
Ayon naman kay Maxine, lumipas muna ang four bago nag-sorry si Kylie kaya ok na sila.