Pagyayabang ni Catriona, kinontra ng ibang beauty queen

Hindi pala type ng ibang mga beauty queen ng Bb. Pilipinas ang sinabi ni Catriona Gray na may unfinished business ito kaya sumali siya sa Bb. Pilipinas 2018.

Ang sabi ng isang former Bb. Pilipinas-Universe title holder, parang sure na sure si Catriona na ito ang mananalo ng Miss Universe Philippines crown eh mas marami ang magaganda at matatalino na kandidata.

Ipinagtanggol naman si Catriona ng isang kakilala nito. Na-misunderstood lang daw si Catriona dahil in person, sweet, mabait at may karapatan na mag-win ng Bb. Pilipinas-Universe crown ang girlfriend ng model/actor na si Clint Bondad.

Kiko suportado ng pamilya

Full support kay Kiko Estrada ang kanyang tatay na si Gary Estrada at stepmother na si Bernadette Allyson.

Dumalo ang mag-asawa sa premiere night ng My Fairy Tail Love Story sa SM Megamall Cinema 7 noong Lunes bilang suporta kay Kiko na isa sa dalawang leading man ni Janella Salvador.

Proud na proud si Gary sa performance ni Kiko sa pelikula na ngayon ang playdate sa mga sinehan.

May reason si Gary para matuwa dahil pinupuri ang acting ng kanyang anak sa My Fairy Tail Love Story.

Kasama nina Gary at Bernadette sa premiere ng My Fairy Tail Love Story ang kanilang mga anak na babae na supportive rin sa Kuya Kiko nila.

Puro babae ang mga anak nina Kiko at Bernadette. Magaganda ang mga bagets at tulad ni Kiko, future stars din sila.

Liza at Julia nagsanib pwersa para kay Janella

Na-starstruck si Gary Estrada kay Liza Soberano nang magkita sila sa premiere ng My Fairy Tail Love Story.

Talagang nag-request si Gary ng photo op, kasama si Liza dahil fan daw siya ng batang aktres na nakatrabaho ng kanyang asawa sa isang teleserye ng ABS-CBN.

Sinuportahan din ni Liza ang My Fairy Tail Love Story dahil BFF niya si Janella. Kasama ni Liza sa red carpet premiere ng Elmo Magalona-Janella movie ang another BFF nila ni Janella, si Julia Barretto.

Mother Lily sobrang techie, marunong mag-FB live

Happy si Mother Lily Monteverde dahil bongga ang reaksyon ng moviegoers sa My Fairy Tail Love Story.

Feeling millennial si Mother dahil naka-Facebook live siya nang dumating sa red carpet.

Tuwang-tuwa ang fans na flattered na flattered dahil kinukunan sila ng video ni Mother Lily. Malaking karangalan kasi sa kanila na binibigyan sila ng importansya ng legendary producer ng Regal Entertainment Inc.

Nakaka-insecure ang pagiging techie ni Mother ‘ha? Dinaig niya ako dahil marunong na siya na mag-Facebook live. Dati-rati, nano­nood lang siya ng mga video sa YouTube kaya naimpluwensyahan niya ako pero siyempre, mas active ako sa Instagram.

Kris pumatol sa hindi kilala!

Naloka kay Kris Aquino ang followers niya dahil minsan lang siya magtaray, pumalpak pa.

Tinarayan ni Kris ang girl na nagsabi na magnanakaw siya. Ang kaso, gumamit ng ibang pangalan at picture ang basher ni Kris kaya wa effect ang mga emote nito.

Matindi sana ang impact ng galit ni Kris sa malditang basher kung nadiskubre niya ang tunay na pangalan at mukha ng girl na duwag naman dahil gumamit ng alias at guilty ng identity theft.