MANILA, Philippines – Madalas na nakikitang palabuy-laboy ang beteranong aktor na si Soliman Cruz sa Roxas Boulevard, kung saan din siya natutulog at minsa’y kinakausap pa ang kanyang sarili. Ano nga ba ang nagtulak sa aktor para magdesisyong mamalagi sa lansangan?
Alamin sa documentary program na Mukha na magsisimula nang umere sa ABS-CBN ngayong Lunes (Sept. 15), 11 p.m. pagkatapos ng Bandila. Sa programa, itinatampok ang iba’t ibang nakakaantig at nakakamanghang kwento ng mga tao at ang kanilang pagpupunyagi sa kabila ng mga pagsubok ng buhay.
Sa episode na isasalaysay ni Ron Cruz, ipapakita ang mga hamong pinagdaraanan ni Sol at ang kanyang mga karanasan sa kanyang bagong tahanan.
Matapos makilala sa pelikulang Ang Pagdadalaga ni Maximo Oliveros, gumawa ng ilang hit teleserye ang aktor. Sa panahong ito, aminado siyang nalulong siya sa bawal na gamot.
Ngayon, maghapong pagala-gala sa buong Maynila si Sol, ngunit bumabalik sa Roxas Boulevard kung saan siya natutulog at nagpapalipas ng magdamag. Paano nga ba natagpuan ni Sol ang kanyang sarili sa kanyang pagkawala?
Huwag palampasin ang Mukha mamaya pagkatapos ng Bandila sa ABS-CBN.