RT-PCR Test sa biyaherong bakunado, inalis na

MANILA, Philippines — Simula Mayo 30 ay hindi na kailangang­ magpresenta ng negatibong resulta ng reverse transcription-polymerase chain reaction (RT-PCR) test ang mga biyaherong Pinoy at banyaga na papasok sa Pilipinas.

Ayon kay acting De­puty Presidential Spokesperson at Communications Undersecretary Michel Kristian Ablan, ang bagong panuntunan ay nakapaloob sa resolusyong inaprubahan ng Inter-Agency Task Force (IATF) for the Ma­nagement of Emerging Infectious Diseases.

 Sa ilalim ng Resolution 168 ng IATF, ang mga papasok na biyahero sa bansa ay hindi na hihingan ng resulta ng RT-PCR test sa kondisyon na sila ay 18 taong gulang pataas at naturukan ng kahit isang booster shot laban sa COVID-19.

Hindi rin hiningan ng pre-departure RT-PCR requirement ang mga edad 12 hanggang 17 taong gulang na nakatanggap na ng dalawang COVID-19 vaccine shots at mga bata na wala pang 12 taong gulang na kasama ng isang fully vaccinated o boosted parents o guardians.

Tinanggal na rin ng IATF sa pinakahuling reso­lusyon ang travel insurance requirement para sa mga papasok na biyahero.

Nauna rito, maaari lamang makapasok sa Pinas ang mga biyahero na may travel insurance para sa Covid-19 treatment na ang minimum coverage ay USD35,000 para sa panahon na nanatili sila sa bansa.