Sweep abot-kamay na ng Benilde
MANILA, Philippines — Hindi nag-aksaya ng sandali ang College of Saint Benilde nang mabilis nitong patumbahin ang University of Perpetual Help System Dalta, 25-14, 25-12, 25-18, para manatiling malinis ang rekord sa NCAA Season 97 women’s volleyball tournament kahapon sa Paco Arena sa Maynila.
Ayaw paawat ni Jade Gentapa nang muli ito maglatag ng solidong laro tangan ang 15 points galing sa 13 attacks at dalawang blocks habang nakatuwang nito sina team captain Mycah Go at Michelle Gamit sa panalo ng Lady Blazers.
Naikonekta ng Benilde ang ikawalong sunod na panalo para masikwat ang twice-to-beat advantage sa Final Four.
“Yung mindset and positive thinking yun siguro ang nagdala sa amin. Paulit-ulit na sinasabi ni coach na kung ano yung tinitraining namin sa court, ilabas lang namin sa game,” ani Gentapa.
Kung mawawalis ng Lady Blazers ang lahat ng siyam na laro nito sa eliminasyon, awtomatiko itong papasok sa finals.
Subalit daraan muna sa matinding pagsubok ang Benilde dahil makakaharap nito ang defending champion Arellano University na kanilang haharapin sa Sabado sa parehong venue.
Tuluyan nang nasibak sa kontensiyon ang Lady Altas na nahulog sa 2-6 marka.
Dominado ng Lady Blazers ang buong panahon ng laro matapos magpakawala ng 38 attacks laban sa 22 lamang ng Lady Altas.
Sa unang laro, ginulantang ng Colegio de San Juan de Letran ang Mapua University, 25-17, 25-21, 25-18, para mapaganda pa ang rekord nito sa 2-6.
Naglista si Juls Castro ng 19 points, 16 excellent digs at apat na excellent receptions para pamunuan ang Lady Knights sa panalo.
- Latest