Herndon dinikit ang SMB sa quarterfinals

MANILA, Philippines — Humugot si Robbie Herndon ng 11 sa kanyang career-high na 21 points sa final canto para bumida sa 122-106 panalo ng San Miguel sa NorthPort sa PBA Philippine Cup kahapon sa Smart Araneta Coliseum.

Nagsalpak din ang Fil-Am guard ng limang three-point shots sa pangatlong dikit na ratsada ng Beermen para muling solohin ang pamumuno mula sa 6-1 kartada.

“I’m so happy what happened to our game tonight. We were able to give some time to those people from the bench especially Robbie,” ani coach Leo Austria.

Umiskor din si six-time PBA MVP June Mar Fajardo ng 21 markers bukod sa 9 rebounds at 3 assists para sa paglapit ng SMC franchise sa quarterfinals spot.

Nag-ambag si Marcio Lassiter ng 18 points at may 17, 15 at 12 markers sina CJ Perez, Paul Zamar at Jericho Cruz, ayon sa pagkakasunod.

Bumulusok naman ang Batang Pier sa kanilang pang-limang sunod na kabiguan matapos ang 2-0 panimula sa torneo.

Matapos makatabla ang NorthPort sa pagtiklop ng third period, 82-82, ay maliit na lineup ang ginamit ni Austria para sa SMB kung saan iniupo niya ang 6-foot-10 na si Fajardo.

Pinamunuan nina Hern­don at Lassiter ang arangkada ng Beermen sa final canto para iposte ang 21-point lead, 111-90, sa huling 4:48 minuto nito.

Mula rito ay hindi na nakabangon ang Batang Pier na naglaro na wala si star guard Robert Bolick na may sprained right ankle injury.

Kumolekta si Arwind Santos, nakasama sa PBA 10,000-point club, ng 25 points, 7 boards, 5 blocks, 3 assists at 2 steals para sa NorthPort at may 20 mar­kers si Roi Sumang.