Mavericks sinibak, 4-1 Warriors nauna na sa NBA finals
SAN FRANCISCO — Sa unang pagkakataon mula nang matalo sa Toronto Raptors noong 2019, magbabalik ang Golden State Warriors sa NBA Finals.
Ito’y matapos dispatsahin ang Dallas Mavericks, 120-110 sa Game 5 ng Western Conference Finals sa likod ng pagbibida ni Klay Thompson na gumawa ng career-hig na 32 puntos.
Taliwas sa nakaraang kabiguan ng Warriors sa Game 4 kung saan naghabol sila ng 29 puntos, kontrolado ng Golden State ang buong tempo ng laro.
Inilabas ni Thompson ang kanyang bangis para pamunuan ang Warriors sa scoring nang pumukol ito ng 12-for-25 mula sa floor, mayroon din siyang kinamadang 8 tres mula sa 16 tangka.
Nakatakdang sagupain ng Warriors, may pagkakataon masikwat ang ika-apat na Larry O’Brien trophy sa loob ng walong taon, ang mananalo sa Boston Celtics at Miami Heat sa Eastern Conference series nila.
Hawak ng Celtics ang 3-2 bentahe sa kanilang serye ng Heat at kung mananalo ngayon maitatakda na ang kanilang banggaan ng Warriors para sa NBA crown.
Tumapos si Stephen Curry, hinirang na Western Conference Finals MVP ng 15 puntos at siyam na assists.
Tangan ng Warriors ang home-court advantage sa pagho-host nila ng Game 1 at 2 sa pagsisimula ng NBA Finals sa Hunyo 2.
Umiskor si Andrew Wiggins ng 18 puntos bukod pa ang 10 rebounds para sa Warriors habang nagdagdag si Draymond Green ng 17 puntos at siyam na assists.
Hindi pa nakarating sa NBA Finals ang Mavs mula nang masungkit ang korona noong 2011.
Tumapos si Slovenian guard Luka Doncic ng 28 puntos, siyam na rebounds at anim na assists para sa Mavericks.
- Latest
