Pinay spikers hinahasa na para sa AVC

MANILA, Philippines — Bagong buo lamang ang women’s national team kaya’t nagsisimula nang bumuo ng chemistry ang tropa para sa nalalapit na laban nito sa 2021 AVC Women’s Club Championship sa Oktubre 1 hanggang 7 sa Nakhon Ratchasima, Thailand.

Aminado si national team head coach Odjie Mamon na kulang pa sa chemistry ang Pinay spikers dahil kailan lamang ito nagsama-sama sa training.

Ngunit magiging madali na ito dahil malalim ang talento ng mga players kahit pa ang ang mga collegiate volleybelles na hindi matatawaran ang husay.

“Nandun na yung talent nila as players kaya ang wino-workout namin talaga yung chemistry ng team. Para maging maganda ang galaw nila sa loob ng court at maging maganda rin ang resulta,” ani Mamon.

Nakatakdang umalis patungong Thailand ang buong koponan sa Setyembre 27.

Hinati sa dalawang grupo ang team.

Ang Team A nina  Aby Maraño, Eya Laure, Jema Galanza, Faith Nisperos, Dindin Santiago-Manabat, Mhicaela Belen, Imee Hernandez, Ivy Lacsina, Rhea Dimaculangan, Kamille Cal, Jennifer Nierva at Bernadette Pepito.

Nasa Team B naman sina Iris Tolenada, Kalei Mau, MJ Phillips, Tin Tiamzon, Kat Tolentino, Mylene Paat, Kianna Dy, Ria Meneses, Majoy Baron, Dell Palomata, Deanna Wong at Dawn Macandili.

 Pasok ang Philippines-Team A sa Pool B kasama ang Supreme Chonburi ng Thailand, Altay ng Kazakhstan at Saipa Tehran ng Iran.