Meralco quarterfinals na

MANILA, Philippines — Humugot si Reynel Hugnatan ng walo sa kanyang 10 points sa fourth quarter para tulungan ang Meralco sa 95-83 paggupo sa Terrafirma sa 2021 PBA Philippine Cup kahapon sa Don Honorio Ventura State University Gym sa Bacolor, Pampanga.

Pinanatili ng Bolts ang kanilang pagkapit sa second spot sa bitbit na 6-2 record para tumangay ng quarterfinal berth.

Hindi naglaro sina star guard Chris Newsome at forward Cliff Hodge dahil sa health and safety protocols kasama ang mga assistant ni coach Norman Black pati na ang team manager ng Meralco.

“We always study the other team and prepare for their offense,” wika ni Black. “But what we talked about is we just have to play together and play for one another.”

Umiskor si Bong Quinto ng 17 points ay may 13, 12, 11 at 10 markers sina Anjo Caram, Allein Maliksi, Raymond Almazan at Alvin Pasaol, ayon sa  pagkakasunod.

Naging dikitan ang laro kung saan nakatabla ang Terrafirma sa 75-75 mula sa three-pointer ni big man Aldrech Ramos sa gitna ng fourth period.

Isang 18-4 atake ang inilunsad ng Bolts na kinatampukan ng dalawang 3-point play ni Hugnatan at dalawang triples ni Caram para iposte ang 14-point lead, 93-79, sa huling 2:18 minuto ng laro.

Nalasap ng Dyip ang ikatlong sunod nilang kamalasan para sa 3-7 baraha matapos magposte ng three-game winning streak tampok ang mga panalo sa San Miguel Beermen, Ginebra Gin Kings at Blackwater Bossing noong nakaraang linggo.

Pinamunuan ni Ramos ang Terrafirma sa kanyang 15 markers, habang may 14 points at 10 rebounds si Joseph Gabayni.

Habang sinusulat ang balitang ito, kasalukuyang naglalaban ang NLEX (4-5) at ang sibak na sa kontensiyon na Blackwater (0-9).