Tito Miguel

Hi,  Tito Miguel! I'm Dave, 18 years old. Magpatambag lang ko nimo kay naa nako sa point nga magsige og emotional breakdown. Feeling nako wala koy ayo. Unsaon nga dili magsige og overthink?

Ambot uy, kalit lang ko nga maguol, pero wala ko kahibawo ngano.

Please help me..

Dave

* * *

Dave,

Wala ka mag hisgot ngano nakasulti ka nga wa ka’y ayo. Lagmit sige ka kumpara sa imong kaugalingon ngadto sa uban, labi na sa imong mga higala sa social media. Undangi na ang pagtandi, kay matud pa sa desiderata, duna gyud mga tawo nga molabaw nimo apan duna sab malabwan nimo.

Kun di gyud malikayan nga makakita ka unsa na’y naabtan sa uban, himoa sila nga hagit ug inspirasyon aron ka maninguha, dili kay mahimo’ng rason nga moubos imo’ng tan-aw sa kaugalingon. Dili lumba ang kinabuhi. Lain lain ta’g agianan ug padulngan.

Daghan ka’g angay ipasalamat, labi na gyud ang imong kahimsog. Kana pa lang daan, naa na ka sa labing maayong kahimtang. Hunahunaa ang uban nga nag antos sa sakit, labi na ang mga himatyon, wa’y gikaon ug di makakaon tungod sa problema nga lawasnon.

Kun kalit ka maguol sa wa’y rason, lagmit mao na’y gitawag nga anxiety attack. Naa sa imong ulo ang imong kontra, nagbuhat kini’g mga imahinasayon nga layo ra sa kamatuoran.

Nagdako ra imo’ng hunahuna apan ang realidad simple ra unta. Mao sad ni ang gitawag nga overthinking, mag sige ka’g hunahuna sa mga dautan nga dangatan nga di raba mahitabo kasagaran. Layo na kaayo’g naabtan. Aron kini malikayan, buhata ang tanan nga imong kontrolado ug ang gawas sa imong katakus isalig sa labing labaw nga imong gituohan.

Tito Miguel