Aabot sa 20 atleta para sa Paris Olympics — Bachmann

MANILA, Philippines — Kumpiyansa si Philippine Sports Commission (PSC) chairman Richard Bachmann na aabot pa sa 20 ang mga national athletes na maisasabak sa 2024 Olympic Games sa Paris, France.

Sa 2021 Tokyo Olympics ay 19 atleta ang kumatawan sa bansa tampok ang pagbuhat ni weightlifter Hidilyn Diaz sa kauna-unahang Olympic gold medal ng Pilipinas.

Sumuntok naman sina boxers Nesthy Petecio at Carlo Paalam ng silver medal habang nagdagdag ng bronze si Eumir Felix Marcial.

“We’re looking for additional athletes to break 19, we all have until June 30 to actually see sino pa atleta who will qualify,” ani Bachmann.

Muling susubukan nina Petecio, Paalam at Marcial na makapag-uwi ng Olympic gold sa pagsalang sa Paris Games kasama sina boxers Aira Villegas at Hergie Bacyadan, pole vaulter EJ Obiena, gymnasts Carlos Yulo, Aleah Finnegan, Levi Jung-Ruivivar at Emma Malabuyo, weightlifters Vanessa Sarno, John Ceniza at Elreen Ando, fencer Sam Catantan at rower Joanie Delgaco.

Ang mga Olympic-bound athletes ay magkakaroon ng isang isang buwan na training camp sa Metz, France bago kumampanya sa Paris Olympics na nakatakda sa Hulyo 26 hanggang Agosto 11.