Petro Gazz isusunod ng Chery Tiggo
MANILA, Philippines — Ginulat nila ang nagdedepensang Creamline at isusunod ng Chery Tiggo ang mainit na Petro Gazz sa 2024 PVL All-Filipino Conference sa Smart Araneta Coliseum.
Haharapin ng Crossovers ang Gazz Angels ngayong alas-6 ng gabi matapos ang bakbakan ng Cool Smashers at Capital1 Solar Spikers sa alas-4 ng hapon.
Tabla sa top spot ng team standings ang Creamline, Cignal HD, PLDT Home Fibr, Petro Gazz at Choco Mucho sa magkakatulad nilang 4-1 kartada kasunod ang Chery Tiggo (3-2), Akari (2-3), Farm Fresh (2-3), Capital1 (1-4), Nxled (1-4), Galeries Tower (1-4) at Strong Group Athletics (0-5).
Humataw ang Crossovers ng 25-18, 26-24, 25-23 upset win sa Cool Smashers tampok ang 20 excellent digs at 10 receptions ni libero Jen Nierva.
Nakatikim muna ng pagkatalo ang Chery Tiggo sa Farm Fresh bago gulatin ang Creamline.
“I’m just so happy na dumating kami sa point na nagkaroon kami ng jelling inside the court,” ani Nierva. “ yong familiarity, tapos with the help of our coaches, iyong system na binago nila since iyong loss namin sa Farm Fresh.”
Nagmula naman ang Gazz Angels sa 25-21, 27-25, 25-19 pagwalis sa Foxies sa likod ng 26 points ni Fil-American Brooke Van Sickle para sa kanilang ikatlong dikit na ratsada.
Muling makakatuwang ni Nierva sina Eya at EJ Laure, Aby Maraño, Ara Galang at Cza Carandang katapat sina Van Sickle, Jonah Sabete, Myla Pablo, Joy Dacoron, Remy Palma at Mich Morente ng Petro Gazz.
- Latest
