Mga Leyte o sinaligan sa Team Khalifa-Cebu

CEBU, Philippines — Nagrepresentar man tuod sila sa Cebu isip mga sakop sa University of San Jose-Recoletos (USJ-R) Baby Jaguars apan ang unom ka mga garbo sa Eastern Visayas naglangkob sa mga sinaligan sa Team Khalifa nga milugwa nga kampiyon sa 2024 Smart-National Basketball Training Center (NBTC) Visayas Regional Finals nga gi-presenta sa SM Supermalls sa miaging semana didto sa Bacolod Tay Tung High School sa Bacolod City.

Gipangulohan sa Baby Jaguars inabagan sa pinili nga mga magduduwa sa University of the Visayas (UV) Baby Lancers, University of Southern Philippines Foundation (USPF) Panthers, Cebu Eastern College (CEC) Dragons, ug Indiana Aerospace University (IAU), ang Team Khalifa-Cebu mipukan sa St. Roberts International College (SRIC)-Elite Lab sa Iloilo, 62-57, aron birahon ang rehiyonal nga korona.

Ang mas mahinungdanon kay ang Team Khalifa naka-angkon og luna sa National Finals karong Marso 18-24 didto sa Mall of Asia Arena sa Pasay City diin mopakita sab og aksiyon ang mga finalists sa UAAP ug NCAA, 10 ka teams gikan sa mga global partners sa NBTC sa Amerika, Canada, Europe, Australia ug New Zealand, upat ka qualifiers gikan sa South Luzon, ug duha ka mga wildcards gikan sa Philippine Under 19 Championship.

Lima ka mga miyembro sa Baby Jaguars nga nagsul-ot sa uniporme sa Team Khalifa ubos sa paggiya ni head coach Melo Banua lumad gikan sa Leyte nga mao sila si Vince Oringo (Tanauan), Alcher Obra (Matalom), King Padoga (Capoocan),Zac Gebrial Negado (Carigara), ug John Lloyd Mejares (Merida). Ang lain nilang kauban nga si Kyle Yabao Rueda nagagikan sa Calbayog City sa silingan nilang Samar.

"There are a lot from Region 8 who are varsity players in Cebu. Like the other cagers from nearby provinces, they flock to Cebu because of exposure and opportunities," matud pa ni Atty. Francis T. Tolibas, ang manedyir sa Team Khalifa.

Abunda sa talento, ang Leyte nakahulma og pipila ka mga dekalibreng pangan sa Philippine basketball sa nanglabayng mga katuigan, ang labing notado kanila mao sila si 19-time PBA champion ug four-time MVP Ramon "El Presidente" Fernandez ug two-time Olympian Joaquin "Jake" Rojas nga parehong gikan sa Maasin ug Rey Evangelista, ang kanhi four-time PBA champion ug five-time All-Star nga kasamtangang naglingkob isip konsehal sa Ormoc City.