CEBU, Philippines — Dunay duha ka mga de kalibreng Pinoy boxers nga naapil sa fight card sa gikahinamang Spence vs. Crawford superfight karong adlawa didto sa T-Mobile Arena sa Las Vegas, Nevada nga mao sila si "The Filipino Flash" Nonito Donaire Jr. ug Aston Palicte nga taga Bago City batok sa tagsa-tagsa nila ka mga kaatbang.
Si Donaire, 40, (42-7-0, 28 KO) gustong pamatud-an nga duna pa siyay ikabuga ibabaw sa ring batok sa 27-anyos nga Mexican boxer nga si Alexandro Santiago alang sa nabakante karong WBC bantamweight title nga gibuhian ni Japanese Pound for Pound “The Monster” Naouya Inoue.
“For me, it does not matter when they say, ‘Oh, you are old already.’ For me, when I say I am old, I am old. When I say I am young, I am young,” matud pang five-division champion Donaire human sa ilang weigh-in.
“I am going in there as a young man, even younger than this guy. I will go out there and take that belt,” puno pa niya kinsa mao karoy No. 1-rated bantamweight sa WBC.
Samtang si Santiago naa No. 3 naghupot og 27-3-5, 14KO nga rekord ug lumad nga taga Tijuana, Mexico.
Kun molampos si Donaire sa iyang tinguha karong adlawa, mabutang siya sa kasaysayan sa boksing nga oldest bantamweight champion of all time, malabwan pa niya ang iyang kaugalingong rekord sa dihang una niyang naangkon ang WBC title sa nag-edad pa siya og 38-anyos.
Si Donaire na- knocked out ni Inoue sa miaging tuig sa ikaduha palang nga round.
Atol sa weigh in, si Donaire nakasulod sa 118-pound bantamweight limit sa iyang timbang nga 117.25 pounds. Samtang si Santiago 117.5 pounds.
Ang laing Pinoy boxer nga mokatkat sa ring mao ang lumad sa Bago City nga si Aston Palicte (28-5-2, 23KO batok sa Mexican nga si Jose Salas Reyes, 12-0-0, 9KO. Palaron kaha ang duha sa ilang mga tinguha didto sa Las Vegas?—IBM