JMD, Donling mag-abot finals sa Javier Ceramics Cup 2023

CEBU, Philippines — Magkuros na sab ang dalan sa magkaribal JMD Automotive ug Donling Aircon and Refrigeration Services alang sa usa ka rematch human gitagak ang ilang tagsa-tagsa ka mga kontra sa semifinals niadtong Domingo diha sa old Sacred Heart gym, Cebu City.

Kahinumduman, ang duha maoy nag-abot sa finals sa Zynergia Cup 2023 niadtong Pebrero 26 diin ang JMD maoy kampiyon.

Ang JMD ni Gerald Dilao midaog batok sa Jot Trucking ni Jeffrey Tagacanao sa low-scoring ballgame, 45-41 ubos sa pagpangulo ni Lucky Mendoza nga miaswat og 16 puntos lakip ang iyang back-to-back jumpshot nga nakapadaog sa koponan ug aron sab moduwa sa finals sa ikaduhang sunod-sunod nga  higayon. Mihimo sab siya og unom ka rebounds ug upat ka assists aron tahuron isip best player of the game.

Gipangulohan sab ni Charly Ocanada ang Jot Trucking pinaagi sa  iyang 12 puntos, samtang si Jason Inocensio miamot og 10 puntos.

Sa unang duwa, ang Donling Aircon mipakaging sa Cake and Memories pinaagi sa overtime, 79-70 aron sab moabante sa finals ning maong liga nga giorganisar sa Brothers Ball League.

Sakit kaayo ang kapildihan sa Cake and Memories kay pirme silang naglabaw atol sa fourth quarter, apan naapsan sa nahabiling 36 segundos sa follow-up ni Kenn Rolf Nunez aron hatagan ang Donling og 67-66 nga bentaha.

Aduna unta'y purohan modaog ang Cake and Memories, apan si Rico Rosaroso nga nakabitik og foul mipasud lang og usa sa duha niya ka free throws hinungdan sa overtime.

Sa dugang singko minutos kontrolado na sa Donling ang duwa hangtod nitingog ang final buzzer.

Si Nunez nga maoy best player ang nangu sa Donling pinaagi sa iyang 22 puntos, pito ka rebounds ug lima ka assists. Si Roldan Daug mitampo'g, 17 puntos ug si Jessie Sanchez miamot og 13 puntos sa team ni Romeo Quilaton Jr.

Ang Cake and Memories ni Allan Paris Caballes gipangulohan ni Rosaroso nga miburak og 29 puntos, gisundan ni Charlee Lumasag nga adunay 12 puntos.