Sixers mitagak ni coach Doc Rivers

CEBU, Philippines — Gipalagpot sa Philadelphia 76ers ang head coach nilang si Doc Rivers human sila matagak gikan sa NBA playoffs sa mga kamot sa Boston Celtics.

Si Daryl Morey, ang presidente sa basketball operations sa Sixers, nagkanayon nga ilang gipakanaog ang maong desisyon human gi-review ang ilang season.

"Doc is one of the most successful coaches in NBA history, a future Hall of Famer, and someone I respect immensely. We’re grateful for all he did in his three seasons here and thank him for the important impact he made on our franchise," matud pa ni Morey.

"After having the chance to reflect upon our season, we decided that certain changes are necessary to further our goals of competing for a championship."

Ang pagpapahawa ni Rivers nahitabo upat pa lamang ka adlaw ang milabay sukad sila gipilde sa Celtics, 112-88, sa Game 7 sa ilang Eastern Conference semifinals.

Mao kadto ang ikatulong sunod-sunod nga season nga ang Sixers nahagba sa ikaduhang hugna sa playoffs. Ang Sixers wala na makatikang pa sa conference finals sukad niadtong 2001.

Taas unta ang paglaum sa Sixers nga maka-abot sa kampiyonato tungod sa hait nga porma ni Joel Embiid, nga maoy gibayaw nga MVP ning season.

Gidayeg hinoon gihapon ni Embiid si Rivers taliwala sa ilang kapakyasan. "He’s been a great leader for all of us, a great motivator."

Apan wala kini makapausab sa hunahuna sa Sixers management nga tangtangon si Rivers, nga mitapon sa ilang kampo niadtong 2020 human mag-coach sa Los Angeles Clippers, Orlando Magic ug Celtics diin siya nakampiyon niadtong 2008.

Si Rivers maoy ikatulong coach nga gipangtagak sa ilang puwesto bisan og ang ilang mga koponan nakataak sa playoffs ning tuiga. Ang laing duha mao sila si Mike Budenholzer sa Milwaukee Bucks ug Monty Williams sa Pheonix Suns.