Brownlee excited makaharap si Arakji

MANILA, Philippines — Makikipagsabayan si Gilas Pilipinas naturalized player Justin Brownlee laban kay Lebanon star player Wael Arakji sa sixth window ng FIBA World Cup Asian Qualifiers na gaganapin sa Pebrero sa Philippine Arena sa Bocaue, Bulacan.

Excited na si Brownlee na makasagupa si Arakji na dati nitong teammate sa Al Riyadi sa Lebanon basketball league noong 2019.

Matatandaang binuhat ni Brownlee ang Lebanese squad para masikwat ang korona sa Lebanon Basketball League at Lebanon Cup.

Kaya naman magandang pagkakataon ito para magkasubukan sina Brownlee at Arakji.

“It will be good to see my former teammates when I was playing in Lebanon. They are very talented, they player a lot of heart just like what we play and I can’t wait to see them,” ani Brownlee.

Alam na ni Brownlee ang hospitality ng mga Pilipino.

Handa nitong mainit na tanggapin ang Lebanon squad sa Pilipinas.

Subalit sa oras na magkrus ang landas ng Gilas Pilipinas at Lebanon, asahan na aniya ang matinding salpukan dahil handa ang Pinoy squad na makipagsabayan sa Lebanese team.

Hangad ng Gilas Pilipinas na makaresbak sa Lebanon matapos yumuko sa fourth window ng qualifiers noong Agosto sa iskor na 81-85.

Makakaharap ng Gilas ang Lebanon sa Pebrero 24 sa alas-6 ng gabi.

Kasunod nito ang pagsagupa ng Pinoy cagers sa Jordan sa Pebrero 27 sa parehong oras.