Pulpogan padayong miratsada sa Alegado Cup
CEBU, Philippines — Ang defending champion Pulpogan nakasustinir sa ilang kainit aron pagposte og duha ka sagunson nga daog sa 11th Mayor Teresa "Nene" P. Alegado Fiesta Cup basketball tournament didto sa Consolacion, Cebu.
Sila si JC Escalona ug Russel Moneva parehong mi-iskor og 15 samtang si Cris Perolino mitali og 13 puntos sa dihang gipaksit sa Pulpogan ang Poblacion Oriental, 114-93, alang sa 2-0 nga marka sa Inter-Barangay seniors category A.
Sa laing mga duwa sa inter-barangay, si Joven Cid Cortes mipatuasik og 20 puntos sa dihang gipayaka sa Lamac ang Cansaga, 85-63, samtang si Teodoro Tundag ug Ranel Capangpangan mipupo ogh 21 puntos matag usa aron pangulohan ang Danglag ngadto sa 92-71 nga paglampaso sa Nangka.
Sa SK category A, sila si Rodolf Ygot, Prince Soquiño ug Patrick Ortiz nagkumboya'g 38 puntos sa dihang gipaluhod sa Pulpogan ang Danglag, 76-62, sila si Bryant Pojas ug Winston Pepito nagkumbinar og 43 puntos aron ituboy ang Nangka ngadto sa 96-72 nga demolisyon sa Poblacion Oriental, samtang sila si Mariano Maglasang ug Kin Dayday nakagitum og 40 puntos sa dihang giipiog sa Lamac ang Tugbungan, 101-89.
Sa Midget division, si Miko Mata dunay 20 puntos sa dihang giwani sa Tayud ang Poblacion Oriental, 76-55, si April Boy Cabansag mitagak og 24 puntos aron tabangan ang Cansaga nga makaipsot sa Lamac, 89-88, samtang sila si Lance Constantin ug Aynrand de la Pena nagkumboya'g 24 puntos sa dihang gipatikangkang sa Nangka ang Danglag, 77-50.
- Latest
