Carampatana 2012, Suprea 2011 midemolis sa mga kontra
CEBU, Philippines — Gipangkastigo sa Carampatana Food Corp. Batch 2012 ug Suprea Ready Mixed Concrete Batch 2011 ang ilang mga kontra sa Sacred Ateneo Alumni Basketball Athletic Association (SHAABAA) Season 25 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.
Si Maverick Suarez mikolekta og 20 puntos, pito ka rebounds, tulo ka assists ug duha ka steals sa dihang gilampornas sa Batch 2012 ang RDAK Batch 2020, 110-56, aron pagpabilin sa ikaduhang dapit sa Division C uban ang 5-1 win-loss record. Sila si Lorenzo Carampatana ug Alexter Tecson nagkumboya'g 29 puntos alang sa Batch 2012, nga wala na mopaginhawa pa sa Batch 2020 sukad sila miposte og 52-22 nga labaw sa halftime.
Sa laing sangka sa Division C, sila si Kent Canieso ug Benedict Andre Chua parehong mikadlit og double-double sa dihang gibuntog sa SABR Solutions Batch 2018 ang Storage Town Batch 2015, 78-73.
Si Canieso mipupo og 17 puntos, 14 ka rebounds ug unom ka assists samtang si Chua mihipos og 15 puntos, 14 ka rebounds ug tulo ka assists aron pangulohan ang Batch 2018 sa ikaduha nilang daog sud sa tulo ka duwa.
Si Eroll Pastor nagparamdam sab sa Batch 2018 bitbit ang 15 puntos, siyam ka rebounds ug tulo ka assists ingon man si Joshua Vincent Mah nga mitali og 14 puntos, tulo ka rebounds ug upat ka assists.
Sa Division B, si Kiefer Lim mipabuhagay og 29 puntos, tulo ka rebounds ug tulo ka assists sa dihang gipatilaw og pilde sa Batch 2011 ang Bad Boys Wingz Batch 2007, 67-31, samtang si Franco Te mipabuto og 27 puntos, siyam ka rebounds, duha ka assists ug tulo ka steals sa dihang gipiog sa 04 the Win 2004 ang Batch 2006, 64-61, sud sa overtime. Ang Batch 2011 nagtangag na karon og 3-1 nga baraha samtang ang Batch 2004, nga nakakuha sab og 14 puntos ug 15 rebounds gikan ni Clay Gumalo, miangkon sa ikduha nilang daog sud sa lima ka duwa.
- Latest
