Tropang Giga tatabla sa game 4
MANILA, Philippines — Ang dalawang dikit na kabiguan ang naghulog sa nagdedepensang TNT Tropang Giga sa 1-2 pagkakaiwan sa San Miguel sa championship series.
Sa pagbabalik sa bench ni coach Chot Reyes ay inaasahang mabubuhay ang koneksyon ng PLDT franchise ngayong alas-6 ng gabi sa Game Four ng 2022 PBA Philippine Cup sa Smart Araneta Coliseum.
Ang game-winning jumper ni Jayson Castro ang nagtakas sa 86-84 panalo ng Tropang Giga sa Game One bago nakatabla ang Beermen sa Game Two, 109-100, at itinagay ang 108-100 overtime win sa Game Three.
“We’re down 1-2 but we got coach Chot coming back,” sabi ni assistant coach Sandy Arespacochaga na gumabay sa TNT sa Games Two at Three. “That’s a very big boost for us.”
Hinawakan ni Reyes ang Gilas Pilipinas na yumukod sa Lebanon sa 2023 FIBA World Cup Asian Qualifiers sa Beirut at umuwi sa bansa kahapon ng umaga.
Hangad naman ng SMB ni mentor Leo Austria na makalapit sa pagkopo sa All-Filipino crown matapos magkampeon sa torneo noong 2019 kasunod ang pagputok ng coronavirus disease (COVID-19).
“I’m sure with the arrival of their coach they’ll be better next game,” ani Austria na muling sasandal kina six-time PBA MVP June Mar Fajardo, CJ Perez, Vic Manuel, Jericho Cruz, Marcio Lassiter at Chris Ross katapat sina Mikey Williams, Jayson Castro, RR Pogoy, Troy Rosario, Poy Erram at Kelly Williams ng TNT.
“Talagang nakakatakot itong TNT,” ani Austria. “But I’m sure, they’ll bounce back because they are equipped with everything and they know what we are doing.”
- Latest
