ARQ Sports dunay laing pasundayag

CEBU, Philippines — Gikan sa basketball ngadto sa boxing, si ARQ Sports big boss Jason Arquisola modalit og laing kalingawan sa mga Sugbuanon.

Kini gumikan kay ang Khalvis Bullies ni Arquisola mopahigayon sa labing unang American Bully dog show dinhi sa Sugbo sunod bulan.

Si Arquisola maoy tag-iya sa multi-titled ARQ Builders ballclub nga mipakita'g aksiyon sa nagkadaiyang mga liga apil na niini ang Pilipinas Super League (PSL) Under 21 Aspirants Division.

 Taliwala sa pandemiya duha ka tuig na ang milabay, gi-establisar ni Arquisola ang ARQ Boxing uban ang tinguha nga makahatag og paglaum sa mga boksidor ug ingon man makahatag kanila og kapanginabuhian panahon sa kalisdanan.

Wala masayri sa uban nga duol sab sa dughan ni Arquisola ang mga iro.

Og pinaagi sa iyang Khalvis Bullies Kennel Club, si Arquisola ug ang iyang grupo mopahigayon sa "Cebully Mania:Come Out and Play" American Bully dog show karong Agosto 28 didto sa IC3 Convention Center.

Ang maong makasaysayanong pasundayag adunay pagtugot gikan sa American Bully Kennel Club (ABKC) nga toa magbase sa Fredericksburg, Virginia, USA.