Embiid, Giannis ug Jokic mga MVP finalists
CEBU, Philippines — Ang reigning Most Valuable Player nga si Nikola Jokic sa Denver Nuggets, si Joel Embiid sa Philadelphia 76ers, ug Giannis Antetokounmpo sa defending champion Milwaukee Bucks ginganlan kagahapon nga mga MVP finalists ning 2021-22 NBA season.
Ang tulo ka mga superstars migiya sa tagsa-tagsa nila ka koponan sa playoffs ug dako ang puruhan nga makampiyon ubos sa ilang pagtimon. Nilang tulo, si Jokic ra maoy nahoyhoy ang abaga pagsugod sa NBA playoffs human ang Nuggets gipakaging sa Golden State Warriors. Si Embiid maoy nangu sa 76ers sa dihang ilang gilampaso ang Toronto Raptors samtang si Giannis maoy bida sa dihang gi-ihaw sa Bucks ang Chicago Bulls.
Sa laing bahin, ang mga finalists sa NBA Coach of the Year mao sila si Taylor Jenkins sa Memphis Grizzlies, Erik Spoelstra sa Miami Heat, ug Monty Williams sa Phoenix Suns. Mga kandidato pagka-Defensive Player of the Year mao sila si Rudy Gobert sa Utah Jazz.
Marcus Smart sa Boston Celtics, ug Mikal Bridges sa Suns.
Mag-ilog sa Most Improved Player award sila si Ja Morant sa Memphis, Darius Garland sa Cleveland Cavaliers, ug Dejounte Murray sa San Antonio Spurs.
Pagapilian alang sa Sixth Man of the Year sila si Tyler Herro sa Heat, Cam Johnson sa Suns, ug Kevin Love sa Cavs.
Samtang magkumbati alang sa Rookie of the Year sila si Scottie Barnes sa Raptors, Cade Cunningham sa Detroit Pistons, ug Evan Mobley sa Cavs.
- Latest
