Warriors gipasaop ang Suns

CEBU, Philippines — Si Stephen Curry namawi gikan sa usa sa labing bati nga salida sa iyang karera pinaagi sa pagpuntos og 23 sa dihang gipakgang sa Golden State Warriors ang 18 ka sagunson nga daog sa Phoenix Suns,  118-96, sa NBA kagahapon didto sa Chase Center sa San Francisco, California.

Sa kinatibuk-an, si Curry milansang og unom ka tres uban ang lima ka rebounds ug susamang gidaghanon sa assists alang sa Warriors nga mao na karon ang nagkupot sa labing nindot nga 19-3 record sa NBA. Usa lamang hinoon ka lugas ang ilang gintang sa Suns nga dunay 19-4 nga marka.

Si Andrew Wiggins midugang og 19 puntos samtang si   Draymond Green dunay nuybe puntos, siyam ka rebounds ug siyam sab ka assists alang sa Warriors nga miinat sa nagkadena nilang daog didto sa ilang korte ngadto na sa 11 ka duwa.

Si Deandre Ayton mirehistro og 23 puntos ug unom ka rebounds, samtang si Chris Paul midugang og 12 puntos ug walo ka assists sa pilderong Suns.

Didto sa New York, si Kevin Durant mi-iskor og 30 puntos sa dihang gipiog sa Brooklyn Nets ang Minnesota Timberwolves, 110-105.

Si Durant, nga mipasud og 12 sa 13 niya ka free throws, gi-abagan ni Patty Mills nga mikadlit og 23 puntos.

Wala sab magpabitin si James Harden nga mibugha og 20 puntos, siyam ka assists ug pito ka rebounds ug ingon man si LaMarcus Aldridge nga miduhang og 13 puntos alang sa Nets nga midaog kalima sa miagi nilang unom ka duwa aron inaton ang ilang record ngadto sa 16-6 nga maoy labing nindot sa Eastern Conference.

Si D’Angelo Russell mihipos og 21 puntos, sila si Naz Reid ug Anthony Edwards mitali og 19 puntos matag usa samtang si Malik Beasley dunay 18 puntos alang sa Timberwolves nga napukan katulo sa katapusan nilang lima ka aksiyon.

Sa laing resulta, si Donovan Mitchell miratsada og 34 puntos ug unom ka assists aron pangulohan ang Utah Jazz ngadto sa 137-130 nga pagpakaging sa Boston Celtics.  Dako sab og natampo si Mike Conley nga mipupo og 29 puntos ug pito ka assists ug ingon man si Rudy Gobert nga mikimada og 18 puntos ug 12 ka rebounds alang sa Jazz.

Si Jayson Tatum mipaulbo og 37 puntos samtang si Dennis Schroder ug Al Horford nagkumboya og 47 puntos sa pilderong Celtics.