SMB gipatilaw og pilde ang TNT

CEBU, Philippines — Napilde sila sa way daog nga koponan sa miagi nilang duwa apan impresibo nga namawi ang San Miguel Beer human gipaluhod ang way pilde niining karibal.

Usa ka semana sukad sila gibihag sa Terrafirma Dyip, ang Beermen mibangon nga lig-on dayon na ngadto sa pagpatilaw sa TNT Tropang Giga sa labing una niining pilde, 83-67, sa sa PBA Philippine Cup didto sa DHVSU gym sa Bacolor, Pampanga.

Luyo sa sayong pagpanginit nilang Terrence Romeo ug Marcio Lassiter, ang Beermen mibulhot sa 18-2 nga labaw ug wala na molingi pa sukad niadto.

Sila si Romeo ug Lassiter nagkumboya og 35 puntos aron tabangan ang Beermen pagbugto sa unom ka sagunson nga daog sa Tropang Giga.

Dako sab og naambag sila si Mo Tautuaa ug CJ Perez nga mitali og 13 puntos matag usa ug ingon man ang Sugbuanong higante nga si June Mar Fajardo nga milangkat og 17 ka rebounds uban ang otso puntos alang sa Beermen nga nagkupot na karon og 4-2 nga baraha.

Si Kib Montalbo dunay 13 puntos sa Tropang Giga nga bisan og naparot pabiling naghari sa liderato uban ang 6-1 record.