Shiga Lakestars misibog presson uban ni Kiefer Ravena

CEBU, Philippines — Giuswag sa Japan B. League team nga Shiga Lakestars ang ilang press conference alang ni Kiefer Ravena karon untang adlawa, Hunyo 7.

Kini human ang PBA Board mipakanaog og desisyon niadtong Sabado nga nagmando ni Ravena nga tahuron ang iyang kontrata uban sa NLEX Road Warriors.

Sigun sa opisyal nga pamahayag sa Lakestars nga gitaho sa Philstar.com kagahapon, gisibog ang maong presscon aron paglikay og dugang kalibog sa sitwasyon.

Ang PBA mipahibawo na sa B. League sa ilang resolusyon nga nagdili ni Ravena nga makaduwa sa maong Japanese ballclub. Si PBA chairman Ricky Vargas nagkanayon nga pinal na ang ilang desisyon.

Si Ravena mipirma og lab-as nga tulo ka tuig nga kontrata uban sa NLEX niadto lamang Septiembre sa miaging tuig ug buot sa PBA nga tumanon niini ang pinirmahan niyang obligasyon sa Road Warriors.