JKA-Argao abli na sa publiko

CEBU, Philippines — Giablihan sa bag-ong natukod nga Japan Karate Association-Nihon Karate Kyokai (JKA-NKK) Philippines Inc.-Argao Chapter ang ilang pultahan sa publiko dili pa lamang dugay didto sa Flores Mini Gym sa Barangay Poblacion, lungsod sa Argao habagatang bahin sa Sugbu.

Baynte kuwatro ka mga bata ug batan-on ang misalmot sa maong okasyon diin sila gitudloan sa basic technique exercises nga gipangulohan nilang JKA-NKK Philippines President ug UCLM Collefe of Crimonology Dean Shihan Dr. Paul Pioquinto ug Representative Instructor Sensei Lt. Emmanuel “Manny” Flores, Ret. PNP. Si Flores midasig sa tanan bata man o hamtong sa pagsulay og kat-on sa karate tungod kay pinaagi nila makab-ot nila ang disiplina, kakugi, determinasyon, maayong panglawas, ug sportsmanship.

Sa iyang bahin, si Pioquinto mipadayag ngadto sa mga bata ug sa ilang mga ginikanan nga ang sports sama sa karate makahatag kanila og oportunidad nga makakuha og athletic scholarship sa mga kolehiyo o unibersidad. Gihimo niyang ehemplo ang iyang kaugalingon kay nalibre man ang iyang pagtungha sa kolehiyo isip student-athlete sa University of Cebu.

Kinsa kadtong interesado moapil sa ilang training mahimong mobisita sa Flores Gym sa adlaw nga Martes, Huwebes o Sabado. Pangitaa lang si Manny Flores o tawag/text sa 0927-0866000.