Nets mibitik sa Raptors, mibira luna sa playoffs
CEBU, Philippines — Miabante na sa playoffs ang Brooklyn Nets human makabitik og daog batok sa Toronto Raptors, 116-103 sa NBA kagahapon didto sa Tampa, Florida.
Si Kevin Durant miiskor og siyete sa iyang 17 puntos sa fourth period, samtang si Jeff Green mipabuto og 22 puntos alang sa Nets. Si Durant, kinsa niduwa sa ikaduhang higayon gikan sa bun-og sa iyang paa, milangkat sab og 10 ka rebounds sud sa 33 minutos alang sa iyang ikawalong "double-double" karon nga season.
Si Durant miposa og usa ka 3-pointer sa nahabiling 1:47 sa duwa nga mipabante sa Nets, 111-101.
Ang Nets maoy unang team sa Eastern Conference nga nakabira og luna sa playoffs.
Ang Raptors gipangulohan ni Kyle Lowry nga mitusak og 24 puntos, apil ang unom ka 3-pointers, apan wala kini kapahimusli kay naputol ang ilang lima ka sunod-sunod nga daog sa ilang korte.
Sa lain pang mga aksiyon, ang Oklahoma City Thunder mipakaging sa Boston Celtics, 119-115, ang Milwaukee Bucks mipilde sa Charlotte Hornets, 114-104, gipukan sab sa Portland TrailBlazers ang Indiana Pacers, 133-122, ang Minnesota Timberwolves mipahagsa sa Houston Rockets, 114-107 ug ang Dallas Mavericks milubong sa Golden State Warriors, 133-103.
- Latest
