Pacquiao-Crawford fight niluluto na?
Target sa June 5 sa Middle East
MANILA, Philippines — Posibleng ikinakasa na ang bakbakan nina eight-division world champion Manny Pacquiao at World Boxing Organization (WBO) welterweight champion Terence Crawford.
Nagsulputan ang balita sa iba’t ibang boxing website na inaayos na ang Pacquiao-Crawford fight na target ganapin sa Hunyo 5 sa Abu Dhabi, United Arab Emirates.
Ayon sa ulat ng The Athletic, ipinaalam na ng Top Rank Promotions sa ESPN (network partner) at In Demand (pay-per-view distributor) ang posibleng Pacquiao-Crawford mega bout sa naturang petsa.
Sa hiwalay na ulat, sinabi ni Top Rank Promotions chief Bob Arum na may malaking pasabog ang kampo nito patungkol sa susunod na laban ni Crawford.
Inaasahang maglalabas ang Top Rank ng announcement anumang araw ngayong linggo.
Subalit hindi nilinaw ni Arum kung si Pacquiao ang tinutukoy nitong makakalaban ni Crawford.
Tanging naging patikim nito ang salitang “major fight.”
“There’s going to be an official announcement within the week on Bud Crawford’s next fight can’t reveal it now, but it will be a major fight,” ani Arum sa panayam ng Barbershop Conversations
Ayaw ni Arum na pangunahan ang lahat kaya’t mas minabuti na lamang nitong tumahimik muna.
“It will be an official announcement of a major PPV event...date, venue, everything. I’m not at liberty to discuss it at this time, but it’s a big deal, and not just any old fight. It will be announced later this week, and all the details will be disclosed,” dagdag ni Arum.
Marami ang niniwala na si dating world champion Mikey Garcia ang masuwerteng boksingero subalit hindi pa rin naaalis ang pangalan ni Crawford gayundin ang iba pang boxers gaya ni Errol Spence Jr. na nagmamay-ari naman ng World Boxing Council (WBC) at International Boxing Federation (IBF) welterweight belts.
Tahimik pa ang kampo ni Pacquiao sa usaping ito.
- Latest
