Lakers Gilumsan Ang Warriors
CEBU, Philippines — Nitala sa iyang ikaupat nga "triple-double" si LeBron James dihang gilumsan sa Los Angeles Lakers ang Golden State Warriors, 128-97 sa nagkainit nga aksiyon sa National Basketball Association kagahapon didto sa Chase Center sa San Francisco.
Si James mihipos og 22 puntos, 10 ka rebounds ug 11 ka assists sa Lakers nga nidominar sa halos tibuok duwa.alang sa ilang impresibong daog sa gawas sa ilang balwarte.
Gipangulohan ni Stephen Curry ang Warriors nga miduslak og 27 puntos, apan wala sila makalahutay sa kusog nga bul-og sa opensa sa Lakers.
Sa maong daog, ang Lakers pabiling nahimutang sa ikatulong dapit sa Western Conference standing uban ang 26-13 win-loss record, samtang ang Warriors nalabay sa ikasiyam nga dapit bitbit ang 20-20 nga baraha.
Sa laing bahin, si Giannis Antetokounmpo milansang sa iyang ikatulong sunod-sunod nga "triple-double" dihang ang Milwaukee Bucks miinat sa sagunson nga daog ngadto sa upat pinaagi sa pagpilde sa Washington Wizards sa iskor nga 133-122.
Si Antetokounmpo adunay 31 points, 15 rebounds ug 10 assists sa laing MVP-caliber performance duha ka adlaw human sa iyang 33 puntos nga "triple-double" batok sa Wizards.
Didto sa Dallas, si Kawhi Leonard mipabuto og 22 puntos alang sa LA Clippers nga nakabawi human gipilde ang Dallas Mavericks sa iskor nga 109-99.
Si Paul George miiskor og 15 puntos dihang pito ka mga magduduwa sa Clippers ang miiskor og double figures. Si Luka Doncic miposte sa iyang ikasiyam nga "triple-double" uban ang 25 puntos, 16 ka assists ug 10 ka rebounds aron pangulohan ang Mavericks.
Mipabuto sab og 22 puntos si Kristaps Porzingis alang sa pilderong Mavs.
Sa Denver, si Nikola Jokic milansang sa iyang ika-35 nga "double-double" uban ang 32 puntos ug 14 ka rebounds aron pangulohan ang Denver Nuggets paglubong sa Indiana Pacers sa iskor nga 121-106.
Sila si Michael Porter Jr. ug Will Barton mitampo'g 20 puntos matag usa sa Nuggets nga mipabuhagay og mga puntos sa fourth quarter aron modaog.
Si Malcom Brogdon maoy nangulo sa Indiana sa iyang 24 ug si Justin Holiday miamot og 19 puntos.
- Latest