Butler nangu sa Heat pagpahagsa sa Rockets

CEBU, Philippines — Mitala si Jimmy Butler sa iyang unang 'triple-double'  karon nga season uban ang 27 puntos, 10 ka rebounds ug 10 sab ka assists alang sa Miami Heat nga nibagsak sa Houston Rockets, 101-94 sa NBA kagahapon didto sa Toyota Center sa Houston, Texas.

Ang daog maoy ikaupat nga sunod-sunod nga Heat ug mipahamtang sa Rockets sa ikaupat  niining sagunson nga pilde. Hapit makabaton ang Heat og duha ka players nga maka-triple double human si Bam Adebayo mikulit og 10 puntos, 13 ka rebounds ug walo ka assists sa wala pa mogradwit pipila ka minutos ang nahibiling oras sa duwa.

Ang Heat nabiyaan og 13 puntos sa first half, apan nanginit uban ang solidong depensa sa third period aron moabante og 12 puntos paingon sa fourth quarter. Namintinar nila ang 12 puntos nga labaw human sa dunk ni Adebayo sa wala pa ang Rockets milusad og 9-0 run aron pagsikit sa iskor, 97-94 sa hinapos nga bahin sa fourth quarter. 

Si Butler miposa og duha ka free throws sa katapusang 10 segundos ug ang Heat mihimo og laing duha ka free throws sa final seconds aron pagselyo sa daog.

Sila si John Wall ug Eric Gordon maoy nitimon sa Rockets nga parehong milansang og 17 puntos.

Didto sa Boston, si Semi Ojeleye  miiskor og career-high 24 puntos uban ang unom ka 3-pointers alang sa Celtics nga milubong sa Toronto Raptors, 120-106 didto sa TD Garden sa Boston, Massachusetts.

Ang rookie nga si Payton Pritchard mitampo og 20 puntos ug mihimo og career-high  unom ka tres aron tabangan ang Boston pagputol sa ilang ikaduhang sunod-sunod nga pilde. Si Kyle Lowry maoy topscorer sa  Raptors pinaagi sa iyang 24 puntos ug unom ka assists, gisundan ni Pascal Siakam nga adunay 23 puntos.