Big 3 sa Nets nagkumboya'g 89 puntos
CEBU, Philippines — Ang 'Big Three' sa Brooklyn Nets nagkumboya'g 89 puntos sa ilang pagbihag sa Atlanta Hawks, 132-128 sa overtime sa kulbahinam kaayo nilang duwa sa NBA kagahapon didto sa State Farm Arena sa Atlanta, Georgia.
Gipangulohan kini ni Kevin Durant nga misapyaw og 32 puntos uban ang lima ka rebounds, gisundan ni James Harden nga misarap og 31 puntos, 15 ka assists ug walo ka rebounds ug Kyrie Irving nga nibitik og 26 puntos ug pito ka assists.
Si Trae Young mikabkab og 28 puntos ug 14 ka assists aron sab pangulohan ang nasukarap nga Hawks. Si Cam Reddish mirehistro og season-high 24 puntos, samtang sila si John Collins ug De'Andre Hunter mipupo og 21 puntos matag usa.
Ang dunk ni Durant naghatag sa Nets og 127-121 nga bentaha sa overtime. Human si Young mipasud og usa sa duha ka free throws aron makitkitan ang labaw ngadto sa 129-126, si Durant nakahimo og turnover sa nahabiling 40 segundos nga naghatag sa Hawks og higayon nga makahimo og opensiba, apan ang long jumper ni Hunter mikagar nga posible untang moresulta sa panagtabla.
Giinat ni Harden ang labaw sa Nets pinaagi sa pagtusak og duha ka free throws sa katapusang 4.6 segundos.
Sa laing mga aksiyon, ang Los Angeles Lakers napilde ngadto sa Philadelphia 76ers, 106-107, ang Indiana Pacers mipukan sa Charlotte Hornets, 116-106, gipilde sab sa Cleveland Cavaliers ang Detroit Pistons, 122-107.
Ang Sacramento Kings milubong sa Orlando Magic, 121-109, gilubong sab sa Denver Nuggets ang Miami Heat, 109-82 ug ang Milwaukee Bucks midaug batok Toronto Raptors, 115-108.
- Latest
