Cebuano sharpshooter Roy Barro nangharos sa Manila

CEBU, Philippines — Wala man tuod siya makapakita'g aksiyon sud sa pipila ka bulan gumikan sa sports lockdown taliwala ning pandemiya, apan ang Sugboanong sharpshooter nga si Roygbiv 'Roy' Barro nagpabiling hingigo sa iyang pagbalik sa firing range.

Armado gihapon og hait nga tinirahan, si Barro mihakot og pipila ka mga kampiyonato sa nagkadaiyang kompetisyon nga iyang gisalmotan didto sa kaulohan sud sa usa ka bulan aron tak-upon ang iyang kampanya ning tuig 2020 sa mabungahon ug mabulukon nga paagi.

Ang 20-anyos nga si Barro unang naghawod sa juniors category sa 18th Mac Mac Cup didto sa Plaridel, Bulacan niadtong Nobiyembre 28-29.

Sunod niini, iyang gibira ang korona sa juniors class sa Las Piñas CPS Shoot didto sa Muntinlupa niadtong Disyembre 2.  Tulo ka adlaw ang milabay, nanghawod na sab siya sa Team One 93 Shoot didto sa Binangonan, Rizal.

Si Barro nga usa sab ka  football varsity sa De la Salle University diin siya kanunay nga Dean's Lister, nakasustinir sa iyang kainit pinaagi sa pagdominar sa juniors category ug paglugwa nga overall champion sa standard division sa 2nd LTFRB Chairman's Cup niadtong Disyembre 12-13 didto sa Batangas.

Gitabangan sab ni Barro ang Laguna-Practical Shooting Group (LAG-PSG), nga maoy inahan niyang gun club, pagtapos ngadto sa 4th place overall sa standard division sa 24th Battle of the Gun Clubs niadtong Disyembre 9-13 didto sa Armscor Firing Range sa Marikina City.

Sa individual result sa maong torneyo nga gisalmotan sa labing banggiitan nga practical shooters sa nasud, si Barro No. 22 overall sa labing nag-unang mga sharpshooters sa Pilipinas.