Duha ka boxing cards sa Omega kasado na
CEBU, Philippines — Andam na ang tanan alang sa duha ka closed-door boxing events sa Omega Sports Promotions International (OSPI) karong Disyembre 18 didto sa IPI Sports and Recreational Complex sa Barangay Tingub, Dakbayan sa Mandaue.
Kay ang Games and Amusements Board (GAB) mitugot og lima lamang ka away matag promosyon, gitunga sa OSPI ngadto sa duha bahin ang umaabot nilang kalihukan.
Ang una mao ang "Kumbati 6" nga magsugod sa ala-1 sa hapon.
Magbinukbukay mao sila si Ronnie Mark Vicelles batok Arnold Garde, Tomjune Mangubat batok Reymond Empic, Carlo Bacaro batok Ryan Maano, Reggie Suganob batok Robert Ates ug Benny Canete batok John Roque Villagonzalo.
Pagasundan dayon kini sa "Kumbati 7" sa alas-7 sa gabii diin mopakita'g aksiyon sila si WBC Asian Boxing Council Silver ug WBO Oriental light flyweight champion Christian "The Bomb" Araneta (18-1, 14KOs), ang wa'y pildeng Ifugao "Wonder Boy" nga si Carl Jammes Martin (15-0, 14KOs) ug kanhi ALA ring star 'Prince' Albert Pagara (32-1, 23KOs) nga mokumbati sa unang higayon ubos sa MTK Global Promotions.
Si Araneta makigharong ni Rolan Jay Biendima, si WBA Asia, WBO Oriental Youth ug WBC Continental bantamweight champion Martin makigtigi ni Richard Rosales, samtang si WBO Intercontinental super bantamweight champ Pagara makigsinukmagay ni Virgil Puton. Sa laing pang mga sangka, si Peter Apolinar moharong ni Danilo Tampipi, samtang si Franco Serafica makigbugno ni Matthew Fondales.
- Latest
