Adios ug salamat Sir Rico

CEBU, Philippines — Kasubo ug kagul-anan maoy mihabol sa Cebu sports kay nawad-an kini og usa ka lig-ong haligi gumikan sa kalit nga pagpanaw sa tinamod ug gimahal nga sportsman nga si Enrico David 'Rico' S. Navarro.

Si Popoy Navarro, ang kamaguwangang anak ni anhing Rico, mipahibawo sa iyang Facebook page nga ang iyang amahan namatay niadtong Martes sa hapon human giataki sa kasingkasing samtang nag-bike didto sa Liloan. Nag-edad siya og 53 anyos.

"On behalf of the family, we'd like to ask for your prayers in this time of distress. We'd also like to thank everyone who has extended their condolences and tributes to Papa. It really does mean a lot to see all these good words being said about him," suwat pa ni Popoy Navarro.

Si Rico Navarro, kanhi presidente sa Sportswriters Association of Cebu (SAC) ug Samahang Basketbol ng Pilipinas (SBP)-Region 7 director, maoy nagsuwat sa senemanang Bleacher Talk column sa The Freeman, igsuong mantalaan sa Banat News sud sa duha ka dekada. Kanunay sab siyang kuhaon nga ring announcer sa mga pro boxing cards ug nagsilbe kanhi nga deputy commissioner sa Cebu Schools Athletic Foundation, Inc. (CESAFI).

Nahimo siyang sakop sa Cebu Football Association (CFA) Board ug nagsilbeng Athletic Director sa Sacred Heart School-Ateneo de Cebu (SHS-AdC) nga mihatag kaniya og Service Award atol sa Ignatian Heroes Appreciation Day 2020 niadto lamang sa miaging bulan.

Dili hitupngan ang pagmahal ni Navarro sa sports. Gikan sa sportswriting ngadto sa sportscasting ug pag-organisar og mga events, mao kini ang pitik sa iyang kasingkasing.

Atol sa sports lockdown tungod sa pandemiya, padayon nga gipasadya ni Navarro ang Cebu sports pinaagi sa pagpasiugda og online talk shows sa FB nga mao ang Bleacher Talk Cebu Goes Live! ug Bida BEST Live.

Nag-una sa iyang mga legasiya mao ang pagtukod sa Cebu Youth Basketball League (CYBL), usa ka tiunay nga grassroots program nga naghatag sa mga batan-ong basketbolista og oportunidad nga mabaid og maayo ang ilang abilidad, maandam sila sa mas dagkong liga ug ingon man mahimong atleta nga dunay karakter ug mga kampiyon dili lamang sa sports, apan hasta sab sa kinabuhi. Ang CYBL mitubo ngadto na sa MVP Sports Foundation Youth League-Cebu kon MYBL karon.

Sa iyang pagtaliwan ngadto sa laing kalibotan, gibiyaan ni Navarro ang pinangga niyang kapikas nga si Ising ug ang duha nila ka mga anak nga si Popoy ug Thirdy.