Davis pabilin sa Lakers

CEBU, Philippines — Gikataho nga si All-Star forward Anthony Davis magpabilin sa Los Angeles Lakers sa higayon nga mobukas na ang NBA free agency.

Subay sa nalatid sa iyang kontrata sa dihang gi-trade siya sa New Orleans Pelicans ngadto sa Lakers, si Davis dunay opsiyon nga mobalhin og laing team human sa usa ka season uban sa L.A., apan dili na kini niya gamiton pa segun sa taho ni Shams Charania sa The Athletic.

Ang ahente ni Davis nga si Rich Paul gikatakda nga makigtigum sa Lakers management aron hisgutan ang  mga opsiyon kabahin sa kontrata ni Davis sa umaabot.

Ang paghigot ni Davis sa ilang poder krusyal kaayo nga lakang sa Lakers alang sa pagdepensa sa ilang titulo sunod season.

Sa una niyang tuig sa Lakers, si Davis mi-average og 26.1 points, 10.4 rebounds, 2.2 assists 1.4 steals ug 2.4 blocks.

Sa playoffs, mirehistro siya og 27.7 points, 9.7 rebounds, 3.5 assists, 1.2 steals ug 1.4 blocks matag duwa.

Impresibo sab kaayo ang mga numero ni Davis sa NBA Finals diin siya miburak og 25.5 points, 10.7 rebounds, 3.2 assists, 1.3 steals ug two blocks matag duwa sa dihang gipilde sa Lakers  ang Miami Heat, 4-2 sa ilang "best-of-seven" series aron sakmiton ang labing una nilang korona sud sa usa ka dekada ug ika-17 sa kinatibuk-an sa ilang prangkisa.