Ancajas, Marcial tumulak na pa-Amerika
MANILA, Philippines — Biyaheng Amerika na sina International Boxing Federation (IBF) junior bantamweight champion Jerwin Ancajas at three-time Southeast Asian Games gold medalist Eumir Felix Marcial upang doon ipagpatuloy ang kanilang paghahanda.
Magkasabay na lumipad patungong Los Angeles, California sina Ancajas at Marcial kahapon kasama ang manager ni Ancajas na si Joven Jimenez.
Mas minabuti ni MP Promotions chief Sean Gibbons na nasa Amerika na sina Ancajas at Marcial habang naghihintay ng kanilang laban.
Inihahanda na ang title defense ni Ancajas ngunit wala pang pinal na petsa at kung sino ang makakasagupa nito.
Nauna nang nakatakda sana ang pakikipagtuos ni Ancajas kay Jonathan Javier Rodriguez noong Abril subalit naudlot ito dahil sa coronavirus disease (COVID-19) pandemic.
Bagama’t hindi natuloy ang laban, tuloy si Ancajas sa ensayo para manatiling nasa kundisyon ang kanyang katawan sakaling may biglaang laban na maikasa.
“Ang ginagawa ni coach, marami akong nakaka-sparring, maraming estilo, para madali kaming mag-adjust,” ani Ancajas.
Huling lumaban si Ancajas noong Disyembre nang itala nito ang sixth-round knockout win kay Miguel Gonzalez para mapanatili ang kanyang IBF belt.
Sa kabilang banda, pumirma kamakailan si Marcial sa MP Promotions na siyang hahawak sa kanyang professional bo-xing career.
Nais ng MP Promotions na isabak si Marcial sa kanyang unang pro fight sa Nobyembre.
Ang MP Promotions din ang magiging kaakibat ni Marcial sa tangka nitong masungkit ang gintong medalya sa 2021 Olympic Games sa Tokyo, Japan.
Sasailalim si Marcial sa matinding pagsasanay kasama si American trainer Freddie Roach.
Hindi maitago ni Marcial ang kasabikan nito na makasama si Roach — ang trainer na humubog kay eight-division world champion Manny Pacquiao.
- Latest
