Celtics mitipi sa Raptors

Abante sa Eastern Conference finals batok Heat

CEBU, Philippines — Natapos na gyud ang lahugay sa "best-of-seven" semifinal series sa Eastern Conference ug ang Boston Celtics maoy nagbawon og dakung katawa dihang milampos sila pagpalayas sa  Toronto Raptors sa ilang trono, 92-87 sa higpit kaayo nilang duwa kagahapon didto sa Orlando, Florida.

Gipangulohan na sab ni Jayson Tatum ang maong kadaogan human miiskor og 29 puntos, samtang si Jaylen Brown midugang og 21 puntos sa Celtics nga midaog sa series, 4-3 ug miabante sa ikatulo nga  Eastern Conference finals sa miaging upat ka seasons.

Mikawat sab og salida silang Marcus Smart ug Kemba Walker nga nagkumboya'g 30 puntos alang sa Celtics nga makigharong batok sa Miami Heat sa "best-of-seven" Eastern Conference Finals nga sugdan karong Miyerkules.

Ang Heat mitikang sa conference finals human gipakaging ang Milwaukee Bucks.

Si Fred VanVleet dunay 20 puntos, si Kyle Lowry mitali og 16 puntos, samtang sila si Serge Ibaka, Pascal Siakam ug Norman Powell nagkumbinar og 38 puntos sa pilderong Raptors, kansang damgo nga manalipod sa ilang trono nahanaw.

Ang Celtics maoy miposte sa nag-unang siyete puntos sa katapusang kuwarter aron pagrehistro og otso puntos nga labaw. Wala na sila molingi pa sukad niadto bisan tuod og kanunay nga nakasikit ang Raptors.

Sa dihang ang Raptors mipaduol sa iskor nga 89-87 sa himalatyong segundos  sa duwa, duna pa unta'y tsansa ang Raptors nga makatabla, apan ang lay-up ni Powell natapalan ni Smart.

Sa dihang naglabaw og tres puntos ang Celtics, 90-87 duna na say oportunidad ang Raptors nga makatabla, apan nasipyat ang tres ni Van   Vleet.

Si Walker milansang dayon og duha ka free throws sa nahibilin nga 7.9 segundos sa duwa aron pagseguro sa kadaogan sa Celtics.