Nuggets miresbak sa clippers, tabla sab ang series, 1-1

CEBU, Philippines — Mibangon ang Denver Nuggets human masugamak dihang ilang gipide ang Los Angeles Clippers, 110-101 sa Game-2 aron tablahon ang ilang "best-of-seven" NBA Western Conference semifinal series kagahapon didto sa Orlando, Florida.

Si Jamal Murray mipaksit og 27 puntos ug si Nikola Jokic mikadlit og 26 puntos uban ang 18 ka rebounds alang sa Nuggets nga sama sa ilang biktima nagbitbit og 1-1 nga baraha.

Dako sab og naambag sa habig sa Nuggets sila si Gary Harris ug Paul Millsap nga parehong mikamada og 13 puntos.

Dominado kaayo sa Nuggets ang duwa gikan sa sinugdanan ug sa usa ka higayon naglabaw og 23 puntos. Wala na sila molingi pa sukad gitak-op ang unang kuwarter uban ang 21 puntos nga labaw sa iskor nga 44-23.

Ang Clippers igo lamang nakasikit ngadto sa singko puntos, 86-91 sa katapusang kuwarter gumikan kay miresbak sab dayon ang Nuggets pinaagi sa 10-0 run dayon na ngadto sa pagkabi og nuybe puntos nga daog.

Si Paul George mipupo og 22 puntos alang sa Clippers nga nakakubit sab og 15 puntos gikan ni Ivica Zubac, apan wala manimaho ang alas nilang si Kawhi Leonard.

Ang two-time NBA Finals MVP nga si Leonard igo lang mihipos og 13 puntos, 10 ka rebounds ug walo ka assists, apan mipasud lamang og upat sa 17 niya ka itsa.

Luspad kaayo ang maong numero alang ni Leonard nga mirehistro og dili momenos 20 puntos sud sa 27 ka duwa sa miagi niyang 28 ka salida sa playoffs.